کراچی...وزیراعظم سید یوسف رضا گیلانی کا کہنا ہے کہ پاکستان اسلحے کی دوڑ میں شامل نہیں ہونا چاہتا، تاہم اپنے دفاع کو یقینی بنانے کے لیے جدید سہولتیں حاصل کی جائیں گی۔ کراچی میں پی این ایس شمشیر کی پاک بحریہ میں شمولیت کے حوالے سے منعقدہ تقریب سے خطاب کرتے ہوئے وزیراعظم سید یوسف رضا گیلانی نے کہا کہ فریگیٹ کی پاک بحریہ میں شمولیت پوری قوم کے لیے اطمینان کا باعث ہے۔ اس سے پاک چین قریبی دوستانہ تعلقات میں مزید اضافہ ہوگا۔ فریگیٹ منصوبہ خطے کی بہتری کے لیے نہایت ضروری ہے۔ پاکستان اور چین اپنے اس عزم پر سختی سے کاربند ہیں کہ کسی جگہ بھی آمنے سامنے نہیں ہوں گے۔ وزیراعظم نے کہا کہ پاکستان چینی حکومت اور عوام کا بہت ممنون ہے۔ پی این ایس شمشیر کی کراچی میں تیاری سے پاکستانیوں کو جدید ٹیکنالوجی سیکھنے کا موقع ملے گا۔ انہوں نے کہا کہ پاکستان عالمی امن کے لیے اپنے حصے سے زیادہ کردار ادا کر رہا ہے۔ وزیراعظم نے گراں قدر خدمات پر پاک بحریہ کو مبارکباد پیش کرتے ہوئے کہا کہ نیوی کی خدمات کبھی فراموش نہیں کی جاسکتیں۔ سید یوسف رضا گیلانی نے کہا کہ پاکستان اسلحے کی دوڑ میں شامل نہیں ہونا چاہتا، تاہم اپنے دفاع کو یقینی بنانے کے لیے جدید سہولتیں حاصل کی جائیں گی۔ وزیراعظم نے گوادر بندرگاہ سمیت متعدد پروگرامز میں چین کے تعاون پر شکریہ ادا کیا۔ اس سے قبل پاک بحریہ کی پروقار تقریب میں وزیراعظم گیلانی کو گارڈ آف آنر پیش کیا گیا۔